遺失回鄉證手續

有朋友遺失通行證（回鄉證）及身份證，唔知點好，幸得高人教路，先至順利返到香港。

而家將詳細手續，供諸大家參考；請大家花啲時間細看內容，真人真
事，唔係吹水。

出門前，請預備定一份通行證（回鄉證）及身份證影印本隨身攜帶，以備不時之需。同時亦將另一份交畀屋企人，朋友戓同事。

以下手續只適用於廣東省內，其他地方就要自己執生。

响廣東省，當真係遺失證件時，你備用嘅影印本係唯一能證明你港人身份嘅文件。假如連呢份都失埋，立即叫持有呢啲影印本嘅人士傳真到酒店畀你。若果連信用卡都一齊遺失，立即打電話返香港報失。

千祈唔好到就近嘅派出所報案，因為報都冇用，佢地唔熟悉處理港人證件嘅程序，會浪費你好多時間。一定要立即趕返深圳。
當由深圳二線進入市區時，需要有通行證或邊防證先至能夠過關，呢個時候攞出通行證同身份證副本，加多兩個錢可憐相，一般關員都會畀你通過。最好係坐火車，車上乘警見到你成個港燦樣一般都唔會查你證件。過關後，直接坐車到深圳羅湖聯檢大樓，直上七樓，嗰度有一個派出所，花大約十分鐘就完成報案手續。記住，無論你啲證件喺邊度遺失，都要話係喺深圳市內唔見，否則佢地會要求你返回遺失嘅城市報案，因為佢地係唔會跨區處理嘅。

當取得報案紙後，需要到深圳市公安局嘅出入口管制部，左手邊有個專辦港澳證件嘅部門（報案紙下面有詳細地址），到呢度嘅目的係要取得一次性嘅出國通行證。請到3號窗攞表格及繳費單，填寫表格及繳費後(CNY$25)，加上之前嘅報案紙同兩張二寸半相片（門口有影相服務），交回3號窗，職員會話你知幾時候有得攞。一般上午申請，下午兩點半就有，若然下午兩點申請，約四點就有。

留意，呢個部門嘅辦公時間只係星期一至五，上午八時半至十一時半，下午二時到四時半（如果冇記錯嘅話）。取得一次性嘅出國通行證後，就可以返回羅湖聯檢樓。但唔係好似平日咁上三樓，因為你持有嘅已經唔係回鄉證。而係要到二樓，填寫藍色嘅出境紙後，與持簽證／護照嘅人一齊排隊出境，通行證係會被收走嘅。返到香港入境處，就要去報案室。呢個時候就好簡單，填表，影相，等約一個小時，就可以入境。

返到香港後，補領身份證，需時兩星期，費用$395。補領回鄉證，需時四星期，費用$560。
申請臨時通行證（一個月內出入二次，總逗留時間一個月），需時五個工作天，費用$350。

另外，當你發現遺失銀包時，希望你仍有一點點錢，因為，從深圳二線關閘到羅湖聯檢樓，約需CNY80；從聯檢樓到市公安局，約需CNY20；在公安局辦證需CNY25，影相需CNY30（四張）；從市公安局回聯檢樓，又需CNY20；即共需CNY175。
若你黑仔到連呢筆錢都冇，唯有自己想想辦法了！

在國內注意事項：
將身份證/回鄉證/現金分開擺放；當有啲天真無邪嘅小孩响你附近玩時，又或者身邊突然多咗啲人時，立即遠離佢地；當你發現有人被偷嘢時，請需注意：因為一般小偷係唔會單獨行動嘅，多事出聲隨時被在附近埋伏嘅人打到變豬頭！
「閒事勿理，眾地莫企」"。

朋友响香港羅湖入境處補辦入境紙時留意到：一小時有二十個香港人入嚟報失銀包，出事率相當高。有大有細，有老有嫩，明搶暗偷，手法層出不窮，千變萬化。以上資料，希望可以幫到各位有需要人士，功德無量。

世界文化遺產

http://clement.beffa.org/labs/apps/worldheritage/#in